九頭身美少女吉川日奈曬馬甲線被逐忽彈

古今中外嘅娛樂圈，無隔一排就興拎啲N年前已經息影嘅紅星返嚟，八掛下人哋而家搞緊乜，從而誕生啲乜美魔女，乘機又煲一煲。好似曾紅極一時嘅日本著名九頭身美少女吉川日奈，2011年雖然跟第二任圈外人丈夫奉子再婚後，移居夏威夷，專心湊女過少奶奶生活，都不忘喺Instagram上載相片同粉絲分享近況，尤其鍾意Po啲做緊瑜珈相，啲超貼身同高難度動作，有時都睇到啲宅男面到紅晒。吉川日奈

近排吉川又再發功，喺IG度Po咗張著三點式Top Shot照，盡曬佢Fit爆嘅馬甲線，可惜唔知係咪件樽領泳池無事業線睇，定係唔小心得罪人，竟然就被班傳媒係咁鞭，逐忽逐忽咁鬧爆，例如一開始炮轟佢塊臉凹晒，四肢骨瘦如柴到好似一個病重老女人，賴以成名嘅長腳仲充滿皺紋，誇張到連腳指啲皮都被彈好老。最後篇報道連佢個胸都唔放過，話佢個胸瞓喺度時已經凹晒，間接證實佢隆過胸嘅傳聞。