大屏幕手機近年市場愈來愈大，好似之前華為推出的 Mate 8 、 Lenovo PHAB Plus 都一直有市場，至於另一間國產的小米，最近都加入大屏幕手機系列，推出小米 Max ，具有 6.44 吋屏幕，同時內置 4850 mAh 電量，最重要是貫徹機價低的賣點，機價只需 $1,799 ，定價比 Lenovo PHAB Plus 更低，絕對抵玩。
尺寸不算大
其實之前有使用過 Mate 8 ，6 吋機身感覺還可接受，但去到 MediaPad X2 的 7 吋或 Lenovo PHAB Plus 的 6.8 吋，明顯覺得部機大好多，好難放得落褲袋，而好似女仔放入手袋先得。至於這部小米Max 又點？ 6.44 吋雖然數字上比較「騎呢」，而拎上手都叫單手拎得住，放落褲袋都可以接受。
高清片唔錯
至於買得巨屏，重點當然是睇片能力，即場利用 YouTube 播放少時 1080p MV 就睇到效果如何。對於高動態畫質，明顯差少少，尤其是跳熱舞時，會出現輕量模糊的問題。但顏色都幾亮麗，細緻度亦都算合格，以手機來說其實已經算是不錯。而且在播放期間，手機亦不算太熱。值得一提的是手機的喇叭都幾大聲，如果鍾意在家中用手機睇片，又不愛用耳機而要喇叭夠大聲，這部機一定合心水。
影相又點？
手機內置 1600 萬像素主相機，當然好多人都期待會同小米 5 或者小米 Note 影相快？好明顯差好遠，小米Max 雖然都有相位對焦，不過在低光環境之下，對焦速度會明顯下降，甚至有對不到焦的問題，好在手機設有點HDR 功能，令相片質素都不算太差。另外，亦都設有魚眼功能，雖然相機真正的魚眼，效果都未算明顯，但有時想玩特效，都叫做有得玩。
效果合格
賣得 $1,799 這個價錢，相信都不會期望部機效果好高，採用 Snapdragon 650 1.8GHz 六核心處理器，算夠用。但記憶體加到 3GB ，用落會較順，不會令睇片窒。值得一提的是機背設有指紋識別功能，雖然好多人都未必會用到，但有總好過無。支援雙卡雙待及 microSD 卡槽，但繼續三選二（即有一條 SIM 卡槽與 MicroSD 卡槽共用）就較為失望。
總結：性價比高
其實以這個價錢又要大屏幕，相信亦只得 Lenovo PHAB Plus 可以比較，但相對地小米Max 的效能更好，如果叫小編揀，都會寜願買小米Max 。不過，如果要挑剔的話，小米 Max 不設快速充電會是一個大問題，就算粒電幾耐用，睇片無快充，好易電話都講不到！另一個重點是今次香港發貨數目有幾多，仍屬未知數，究竟有幾多人搶到，才是重點。
試相
