男士講起貴價行李箱，第一時間會諗起 Samsonite 、 Rimowa （我知 LV 貴，所以咪寫明男士囉），不過，最近又多一個選擇（唔係睇少你，如果你買得起的話……），就是 Lamborghini x TecknoMonster 行李箱，今次會推出四個款，先不說功能而講價錢，最低價都要 $85,000 ，而最貴就要 $135,700 ，比起差不多四萬元一個的 LV 行李箱更貴。
點解可以賣得貴？首先由名稱都睇得出，來自意大利的 TecknoMonster ，賣的行李箱一向都貴，就算是一些比較簡單的款式，價錢都過萬以上，加上 Lamborghini ，更加貴上加貴。而製作上，當然一定有貴價牌子一定見到的「人手製作」四個字，材料上亦使用與 Lamborghini 跑車相同的乾式碳纖維（Dry-carbon）、機械加工鋁合金及頂級皮革等，單是物料都價錢不菲。
而製作過程中，由於純人手製作，所以要特別小心，例如利用高壓艙的高溫烘烤以固定結構，就要花不少時間才能完成，所以每日最多只能生產 3 個。而且更可按客人要求，加設防彈功能，或可配搭自選圖案。加上每一個滾輪可以承受 100kg 負重，不會拖行時爆轆出醜。當然，買得這個行李箱，應該都不會太注重有幾耐壓耐撞，因為至少都坐頭等或私人飛機，行李都不用同其他人迫吧！
出售地點：香港銅鑼灣崇光百貨9樓
