由日本男星山崎賢人，夥拍「全球最靚 100 人」桐谷美鈴嘅新劇《好きな人がいること》（台繹：有喜歡的人），即將喺 7 月 11 號首播，兩個主角近排當然要四出做宣傳，日前仲接受咗最新一期雜誌《 Ray 》訪問，大談劇中主線嘅同居關係。桐谷就話好鍾意同鍾意嘅人一齊做家務，相反山崎賢人就率先爆自己好鍾意用吸塵機外，其他家務都唔多識做。
原本個訪問都無乜料到，不過，識睇緊係睇留言，好多網民竟然留言話：「辛苦晒土屋太鳳」、又估土屋做家務手藝應該一絕，突破盲腸到將佢哋由緋聞男女，直接做埋同居密友。其實，之前都有江湖傳聞話，因為土屋媽媽唔鍾意山崎太過娘娘腔而想棒打鴛鴦，搞到二人關係陷入分手邊緣，若果伯有睇完堆留言，睇怕會嬲到爆血管。
來源：cinemacafe
