盡地一鋪？松嶋菜菜子新劇挑戰床戲網民：預咗無嘢睇～

日本女星松嶋菜菜子雖然 40 有 2 ，但都叫做保養得唔錯，演戲勁到至今仍站於一線位置。嚟緊佢就會孖男星松田龍平，合演下季新劇《営業部長　吉良奈津子》(唔使繹，粒粒字都明)。估唔到，近日就有報章爆料，話近年好多劇集，唔理粒星幾大，收視都大爆死，強如黑木華、福山雅治同有村架純都損手爛腳。菜菜子把心一橫，會獻出處女熒幕床上戲喎。

不過，消息傳出後，老、中、青觀眾都話唔多睇好，事關菜菜子都有返咁上下年紀，你估仲係 N 年前《魔女之條件》嘅超索 Miss 咩。另外，菜菜子貴為一姐，就算肯露條底褲……線都係 Set 喺以光年計咁遠啦。再講，套劇嘅編劇就係《晝顏》嘅井上由美子寫嘅，雖然佢不嬲玩親人妻偷漢，但表達喺畫面度至多都係攬攬錫錫，連上戶彩都 Pass 過到關，都唔使旨意好露骨。所以好多宅男都話預咗無嘢睇。