講到吸塵機又要名牌，一定是 Dyson ，吸塵能力強之外，外型夠型都是賣點之一。最近又有新款推出，今次型號為 Dyson V8 ，轉數達到每分鐘 110,000 萬轉，重量只得 2.6kg ，而且更比上一代寧靜 50% 。吸力強到連煙都全部吸走，至於價錢香港仲未有，但英國就賣 499.99 英磅（約 $5,650 ）。
相信自 Dyson 推出吸塵機之後，好多人都問：點解要用四、五千蚊買部吸塵機？有人會答你型！因為無線之餘，仲可以好似開槍式啟動吸塵機。亦都可能有人答你因為方便，因為按鍵式更換吸咀設計，更換起來更加就手。不過重要是設有兩種吸力，普通吸力都算夠大，開啟 Max 模式後，更可提升至 115AW ，就算地板隙縫都吸得一乾二淨。
而作為新機，今次 V8 都有不少改進的地方，例如吸完垃圾灰塵之後，只要拉一下機頂的紅色掣將摩打拉起，集塵筒底便自動打開排走灰塵。而除了加強吸力之外，在排氣口亦特別加入過濾層，方便濾走致敏原。另外，可充電式電池容量亦都加碼，由上一代只能使用 20 分鐘，變成今代可使用 40 分鐘，而且不會因電量下降而吸力減弱。
不過，有優點當然亦都有缺點，好似一般吸塵機都有的伸縮管， Dyson 不會有，至於吸咀細，要吸走大件一點的垃圾都可能頂住吸風口。雖然集塵筒的容量比上一代加大，但仍然偏細，吸一冷塵，可能要倒幾次垃圾先得。最大缺點是馬力調較製由機背放到機頂，手掌不夠大，便要另一隻手去調較。
