電腦平板近年開始需求大，大廠都陸續推新機，好似 Acer 最近都玩埋一份，推出 Acer Switch Alpha 12 。講到部機，外型其實都係咁上下（有邊部行 Windows 10 嘅電腦平板個樣特別嘅先！），不過廠方今次特別玩「水冷」散熱，都算幾新奇（拆開嚟睇啦笨）。
水冷無風扇
好，拆機呢啲事，等外國有人拆先再報導，首先講下個「水冷」先，以前有砌開電腦，都知咩叫水冷，即係將一堆導管放喺粒 CPU 上面，再注水入去，水不停流動就會帶走熱量，比起風扇散熱更好，可以話係超頻必備。而今次 Switch Alpha 12 用名為 Acer LiquidLoop 散熱技術，原理都一樣，不過就用密封導管設計（唔會有位俾你入水，放心），好處係無風扇聲，亦都唔會有散熱位入塵，部機都無咁易壞。
支架夠硬淨
而另一個賣點，就係後面個支架，同其他機的支架最大分別，就係加上防滑膠邊，主要係放喺枱上面用時，個支架唔會因為你不停咁篤個芒，搞到走晒位。而實際試用個支架，骹位比其他機款較實，抵受篤芒的能力都應該比較高。至於鍵盤方面，採用全尺寸鍵盤，每個鍵都有 1.4mm 深度，打起字都幾就手。
送筆送鍵盤
規格方面，設有 12 吋 2160 x 1440 像素屏幕，機則設有 USB 3.1 插頭，可充電之餘，亦可直接輸出影像。而今次廠方會推出三個型號，分別係 i5 配 128GB SSD、i5 配 256GB SSD 及 i7 配 256GB SSD，售價分別為 $7,998 、 $8,998 及 $9,998 ，全部都會連 Windows 認證 Stylus 筆同鍵盤保護套。
同場兩筆電
除咗部 Switch Alpha 12，同場仲有兩部手提電腦（利申：筆電係台灣用語，唔係強國用語啊！），一部係以薄為賣點的 Aspire S 13，而另一部係 Aspire F15 ，前者主打 14.58mm 薄機身，但仍然可以有 11 小時使用時間。而另一部係主打高效能打機，支援最高 32GB RAM 及 NVIDIA GTX 顯示卡。屋企用又捨得俾錢，後者更加有吸引力。
各機詳細規格
