如果問到女性智能機，大家都應該記得機身鑲水晶的「法國」品牌 SUGAR ，當年曾經因為部機的外型，吸引到不少女用家去買，不過部機規格弱到……有無中伏只能視乎個人使用而定。而最近新一代的 SUGAR 又到港，今次分別有三個型號，是 SUGAR C7 、 Y7 及 S，究竟今次真係食粒糖，還是同樣是糖衣陷阱呢？
最強型號C7
上面所提的最強型號，只限於今次推出的三部機，並唔係市面上最強！ 點解要講到明？因為所謂「最強型號」，規格分別採用 MTK 6735 1.3GHz 四核處理器、3GB RAM 、 32GB ROM ，而屏幕則採用 5 吋 1280 x 720 像素，機背則為 1300 萬主相機，單睇規格，只屬中階到唔中階的機種。
不過，SUGAR 當然唔係主 sell 功能，反而主打水晶，主鏡頭上鑲有 22 粒施華洛世奇水晶，仲粒粒都有「SWAROVSKI ZIRCONIA」鐳射標籤，擺明玩奢華，不過「石」好似少咗啲喎，好貴咩？但部機拎上手……個機邊框有少少似華為，個 Home＋指紋鍵似魅族…….雖然集各家之大成，不過拎上手，其實造工都唔錯，尤其是啡色機似十足麖皮的設計，都幾好揸手。
功能方面，指紋都算齊，做到開鎖、back、快速啟動指定功能，而影相自拍又有美頻同瘦面模式，內置的 app 包括 app lock 、加密箱、Whoscall，甚至連微信雙開（即係一部機開到兩個微信賬戶）都有……啲 app 咁大陸 feel ？可能人哋主打國內市場呢！售錢方面，只賣 $2,298 ，難怪得 22 粒「石」…..
入門雙機SUGAR Y7 / S
至於最強型號都如此，其餘兩部，明顯走入門路線，兩部機都採用 Qualcomm Snapdragon 1.2GHz 四核處理器、 2GB RAM ，而 Y7 設有 16GB ROM 、 5.5 吋 1280 x 720 像素屏幕，並鑲有 14 粒「石」在機側開關及音量鍵上；至於 S 則設有 32GB ROM 、 4.8 吋 1280 x 720 像素屏幕，鑲有16 粒「石」，售價方面，Y7 為 $2,298 ，而 S 則定價 $2,098 ，入門型號同最強型號價錢差不多？鑲石嘅嘢，你識條鐵咩！
