狀態大勇之謎揭曉 戶田惠梨香同加瀨亮撻着

前排講過，日本女星 戶田惠梨香 踏入 2016 年後狀態大勇，不單只日劇密密拍，仲回歸《死亡筆記》電影版，早前電影公司公開嘅預告片，戶田雖然出現短短一秒，但就令無數宅男瘋狂直叫「女神復生」，話長大咗嘅 Misa Misa 愈來愈有女人味。

原來狀態大勇嘅女神，背後原來同戀情有關，日前就有報道指，戶田上年同《 SPEC 》嘅拍檔加瀨亮「真．拍拖」，而當爆出戀情後，兩人嘅事務所仲發聲明表示支持，加瀨亮嘅事務所仲大大隻字讚戶田同加瀨襯到絕。唔怪之得戶田近排人前人後都四萬咁口，一反從前極易黑面嘅「傳聞」。

但係，唔講唔知，戶田上年先不斷咁被傳同前度勝地涼分手，去年 10 月仲被影到一齊去食飯。究竟戶田幾時轉畫，真係一個謎。

來源：リアルライブ