最近掀起一片 Windows 10 tablet 潮，輕量化的機身加上可做到文書工作， Microsoft 的 Surface Pro 4 都賣到斷市，就知有幾多人想買。而最近 Samsung 都分一杯羹，推出 Samsung Tab Pro S ，規格同 Surface Pro 4 差不多，但究竟係咪真係買得過？功能又係咪一樣咁強？以下話你知。
規格：同入門版一樣
雖然買得 tablet 電腦，對效能要求唔多高，但都不能太差，而 Tab Pro S 的硬件定位，同 Surface Pro 4 一樣，採用 Intel Core m3-6Y30 Processor 處理器，同時內置 4GB RAM ，用得 M3 處理器，效能一定唔會太高，大約都係打下字、睇睇片，一般 tablet 做到佢都做到，不過打機、剪片，就一定唔使諗。
屏幕：黑色更實在
Samsung 最出色，當然是屏幕，今次推出的 Tab Pro S ，屏幕則改用 12 吋的 sAMOLED ，解像度 2160 x 1440 像素，質素上雖然比 Surface Pro 4 低（ 2736 x 1824 像素 ），不過肉眼在 12 吋屏幕可以分辨到兩個屏幕解像度有分別，都應該是神級眼先睇得出。反而光位及黑位，明顯 sAMOLED 有更加出色的表現，始終是因為 OLED 特性關係，睇戲自然更靚。
流動性：更輕更薄
由於在設計上， Tab Pro S 並不設有 USB 插頭，所以機身當然無 Surface Pro 4 厚，其中機身只有 6.3 mm，不過加上鍵盤，就有 11.2mm；至於 Surface Pro 4 的厚度為 8.45mm ，而加上鍵盤 13.1mm ，一睇數字，就知 Tab Pro S 的流動性較高。加上 Tab Pro S 的電量達到 5200mAh ，使用時間為 10.5 小時，至於 Surface Pro 4 的電池為 5087mAh ，使用時間為 9 小時，電量亦都 Tab Pro S 較高，經常戶外工作，便加具優勢。
配套：過資料會慢
之前都講過，部 Tab Pro S 不設 USB 插頭，所以設計上同新版的 Macbook 一樣，主要用 Type C 分插（$599）連接其他裝置，不過，原裝分插只會有一個 HDMI 輸出、 USB 及 Type C 充電插頭，相比 Surface Pro 4 機身設有 USB 3.0 ，自然在傳輸大檔案時，後者速度更快。而單一 USB 就要駁上駁先可以同時駁 mouse 同硬碟，其實都幾煩。
文書：少量還可以
既然叫得做電腦，當然重視輸入能力，由於兩部機都會用到連機蓋鍵盤作為輸入。兩個鍵盤以 Surface Pro 4 的鍵盤輸入最似電腦，由於回彈力夠，輸入文字都好就手。相返 Tab Pro S 的鍵盤，由於鍵盤太薄，打字時會有直接按落枱的感覺，回彈性亦比 Surface Pro 4 略為遜色，打得少字還好，打得多，手指一定好攰。
總結：多媒體可考慮
其實由設計應用Tab Pro S 針對的用家，都是以多媒體用途較多的用家，而非一般文書用家。除非你有決心，會另外買無線鍵盤連接使用，否則文書能力相當「有限公司」，反而在多媒體能力上的表現，睇片、睇相就會有更好表現。當然，如果你是女士，外表行先，都應該會揀 Tab Pro S 多。
