「野田妹」愛上偶像 上野樹里 有拖拍喇！

日本女星上野樹里， N 年前憑《交響情人夢》一炮而紅，可惜多年來走唔出野田妹嘅既定型像，星途一直浮沉。好彩佢去年去咗拍韓劇後，啲運好似返返哋嚟，上季套日劇《家族ノカタチ》（家族的形式）口碑都算唔錯。

今日，仲傳嚟好消息，宣布佢同三人組合 Triceratops （トライセラトップス）成員和田唱以結婚為前題下拍咗拖半年，雖然 40 歲嘅和田唱足足大野田妹 11 年，但係上野多年來，講過 N 次話自己非常鍾意呢隊 Triceratops ，講真有咩幸福得過同偶像拍拖？真係恭喜晒野田妹！

來源：日刊 Sports