好多地方都有得食生蟹，例如泰國生蟹、上海醉蟹、北海道蟹腳刺身，去得韓國旅遊，又點可以錯過韓國醬蟹（或稱醬油蟹）呢！？其實如果不嫌貴，在樂天市場有得賣，想平又抵食，都可以去廣藏市場入手。至於坐定定食，亦都有不少醬油蟹、辣蟹專門店食到，但點食先啱？下面慢慢教你。
對於少食生蟹的讀者，或者未必知道不同地方生蟹的味道有什麼分別，或者我簡單講幾句：泰國生蟹屬無添加方式食法，最多加少少魚露同辣妹調味，所以蟹新鮮就好食，否則……。至於醉蟹及醬油蟹則屬同一類，經過一段時間醃製而成，不過前者酒味較為濃烈，後者則以豉油味較重，但肉質較生蟹較為硬淨少少（真係少少咁多），帶有蟹肉發酵後的甜味，同時有輕度「黏」口的感覺。
至於食醬油蟹方法好多，其中一種是蟹身首先除肺（食過大閘蟹都知，癈話！），之後將蟹肉由蟹腳方向擠出，放到白飯一同進食。而我選擇另一種食法，就是將白飯放到蟹上，再吸啜蟹肉。或者你會問：直接食蟹肉又如何？其實都無問題，不過會偏咸，加白飯就剛剛好，而且加上白飯甜味，味道更上一層樓。
至於蟹蓋方面，食法同食蟹肉大同小異，但白飯更加是必須。因為蟹黃變過醃製之後，直接食會感到牙齒表面有一層粉，有點奇怪，反而用飯配食就不會有這個問題。
