講到近期最多人講的手機，非 LG 推出的模組機 LG G5 莫屬，單是玩腳……Sorry,是底部都有排玩。而部機轉頭已經在香港推出行貨，定價$5,698，雖然比想像之中貴，但今次同時會有兩個模組獨立推出，分別是相機模組同B&O靚聲模組，在大家都注視模組有幾好玩的時候，究竟規格又是否值得你去買？停一停，諗一諗……
廣角超好玩
有留意 MWC ，都知部 G5 雖然看似平平無奇，但功能都幾多，其中一個是雙鏡頭玩超廣角，轉換單鏡同雙鏡模式按一個掣即可，轉換時間不足一秒，反應都算快。而超廣角視角有 135 度，比正在使用部 24mm DC機要寬，旅行影風景一流。不過最大驚喜可以影 RAW 相，即是無損格式相片，日後做後製都方便過只得張JPG檔，抵讚。
換模組方便
至於重點的換模組，其實都幾方便，只需要在機底按一下按鍵便會彈出，直接抽出電池同底座，不過由於太過方便，小記有幾次忘記關機就掹，切記留意。至於更換模式，首先要將電池以暴力掹離底座，然後再插到新模組上，經常性掹掹插插，小記都好擔心扣位會否爆開，所以最好不要經常左換右換。
模式有無用？
今次展示的共有兩個模組，一個是 LG CAM Plus ，而另一個是 LG Hi-Fi Plus with B&O PLAY ，看到名稱便知是相機及音色模組。前者相機模組主要加電量及拍攝快捷鍵，等同在手機加上DC握位，單手拍攝都好穩陣，影相、拍片、變焦都可以通過模組做到。至於 LG Hi-Fi Plus with B&O PLAY 更加毋需多講，有 B&O 品牌光環，又可以用 OTG 線駁其他手機用，兩個都好值得買，不過現時未有定價，抵唔抵就仲未知。
效能又點先？
當大家都集中在模組功能時，似乎同 GALAXY S7 Edge 一樣，無去留意效能。今次 G5 的規格，同 S7 Edge 可以話不相伯仲，4GB RAM 配高通 820 四核，老實講，效能並不算高，但好在部機用了差不多一小時，都無明顯過熱問題。值得一提的是，部機支援雙卡雙待，但亦都同 S7 Edge 一樣，其中一個 SIM 卡槽與記憶卡共用，以手機只內置 32GB ROM 來看，你都是當沒有雙卡雙待算吧。
試相
