人夫福山雅治舊年 9 月結婚後就不停行衰運，好多粉絲心碎到要用「福山失去」去形容，連累埋事務所股價大跌。福山為保事業，接咗四月播嘅月九劇《ラヴソング》（硬譯：Love Song ），為隆重其事，電視台仲搞咗個女主角選拔賽，搞到好多上咗位、同未上位女星如柴崎幸、吉高由里子、大原櫻子、小松菜奈等等都傳爭住去面試。
日前電視台就正式公布咗女主角人選，一如所料，女主角人選落咗與福山同一事務所嘅新人歌手藤原櫻。消息一出，緊係被人鬧爆，話電視台搞小圈子選舉唔緊要，都唔好做到咁出面，事關傳聞話，藤原櫻面試當日，得到福山親自伴奏唱歌俾評判聽。電視台為咗「遷就」新人，仲將女主角改名為「櫻」，最最最令觀眾頂唔順，電視台話套劇女主角將會同福山「透過音樂發展一段微妙嘅關係」。班粉絲聽完即刻著晒火堅嬲，話 47 歲嘅福山同 20 歲嘅福山嘅「關係」，至盡都係做兩父女，做情侶只諗到「亂倫」兩個字，套劇唔使睇已經激爛，真係要問：套劇福山仲拍唔拍好？
來源：Asa-Jo
