Casio 自推出了自拍神器之後， DC 相機都以自拍、美顏為中心，最近又推出 Casio EX-ZR3600，如果單睇外型，可以話同前作無太大分別，而新增功能方面，亦都主要以軟件升級為主，相信最大賣點，只得「粉紅嫩肌」模式同強化的自動傳相功能，對女士們又有幾大吸引力？
辨認自拍照
今次其中一個升級功能，主要在於 Wi-Fi 傳相上，其實之前用家只要安裝專用 app ，即可將相片傳到手機，不過今次新升級功能，用家可設定自拍照，先傳去手機。由於毋須全部相都先下載，慳到手機位置，亦都免卻慢慢揀相傳到手機的時間，一收到相立即放上網，快人一步呃到 Like 。
「粉紅嫩肌」效果
另一個賣點，是加入「粉紅嫩肌」效果，固名思意是美白之餘，又可以將面色變得紅潤。當然，為了不至過份浮誇，變化都唔算好大，不過睇落亦都變得精神不少。至於手機亦內置美白、滑肌等功能，想女士們影不到白淨靚相，都幾難。
男士會買嗎？
男士影相當然甚少用美肌，如果一般使用，部機又買唔買得過？論功能，具有12倍光學變焦、25mm廣角、五軸防手震、F2.8光圈、1080p拍片等，基本上去旅行要的功能都齊全，至於對焦方面都算快，又有180度反芒方便構圖，當後備機都得。不過，部機的美顏模式可以話無處不在，如果男士想買呢部機，就千萬不要拎去酒吧、夜店用，否則被人誤認為hehe，就比較尷尬。
試相
