蝙蝠俠世界入面，有個雙面人，每次都會擲硬幣做決定；但除了漫畫人物，原來相機都可以雙面。好似最近 Olympus 便推出新一代的 PEN 機 Olympus PEN-F ，如果睇正面，你可以會以為是一部優閒型相機，但如果睇到部機的背面，就會發現是一部專業機，絕對是一部正宗的雙面機。點解要用這個設計？因為想一次過吸納所有影友！
用 PEN 機製 PEN
對於有玩過菲林相機的用家，應該都會覺得 PEN-F 無論外型還是型號，都相當眼熟。其實這部機的設計原型，是以 1963 年推出的半格相機 PEN F 為藍本設計，除了機身的顏色、連按鍵的擺位都跟到十足，所以懷舊味極濃。其實 PEN-F 都不是首部用舊機殻作原型設計的相機，當年的OM-D亦都一樣，當然，這種擺明「食老本」的做法，相信用家都絕不介意，甚至仲帶動一股復古潮。
反 sell 專業
以前 Olympus 推出 PEN 系列相機，通常力 sell 部機有幾輕幾細幾易用，但今次 PEN-F 就講一大堆專業攝影師先睇得明的用詞，原因好簡單，因為今次這部 PEN-F 主打專業路線，而且更加是頂級機的規格。除了過往用在專業機的五軸防震之外，特別將快門鍵時滯減至 44 微秒，這個數字代表什麼？即時按下即拍反應快，級數仲同 Nikon D800 一樣！
終於有觀景器
一直以來， PEN 機都不設觀景器，甚至為求輕巧，連機頂熱靴位都無。而今次推出的 PEN-F ，講到明想攻埋專業用家，無論觀景器還是熱靴都有齊。不過講到部機的最大特色，一定數到鏡頭旁的轉盤，可以即時進入特效模式，有不少模仿菲林拍攝效果模式及黑色特效可以揀，毋須要入功能選單先用得，方便好多。
插值 8000 萬
對於一般用家，現時像素可能並非首要考慮因素，不過，今次推出的 PEN-F 特別加入插值功能，平時只能拍攝 2000 萬像素相片，但只要進入高解像度拍攝模式，便立即連拍八張相片，影完之後，就會自動合併成一張 5000 萬像素的 JPG 相，或一張 8000 萬像素的 RAW 格式相片。有咩用？最大用途支鏡唔夠長，都可以先影底，返去用PS剪裁後，像素都不會太細！
唔睇價，即買
如果論功能、睇外型，在一眾換鏡細機之中， PEN-F 的吸引性相當高，感覺就好似當年 OM-D 推出時，換鏡細機原來都可以做到如此專業；一部潮機同樣可以。而功能方面，其實無論中階定高階用家，都一定能夠滿足得到。不過，大前題還是「唔睇價錢」，要付出萬四去買 PEN-F ，我寧願等多一段時間減價先買。至於到時又買唔買？到時先算！
詳細規格
試相（像素減半）
