Leica 相機，可說是相機界中的勞斯萊斯，絕對是每位男士一生中必須擁有的十大收藏品之一。以往由於操控困難，旁軸對焦系統下想影張相都不容易，再加上菲林年代，成品要沖曬出來先知有無走焦，有機都未必影到靚相。數碼化後的 Leica 就親民得多，至少可以即時翻睇相片，而且新 Leica SL 仲有自動對焦系統，變得好易用。
不過，想擁有一部Leica並非易事，尤其是限量版款式，就更加一機難求。好似剛推出的 熊貓版Leica M-P ，雖然只是轉色及多了個熊貓logo，但因為兩set套裝機加埋全球限量60套，想用原價買，應該要發夢先得。
今次這部 熊貓版M-P ，分別有28mm f/2及35mm f/1.4兩款鏡頭套裝，各限量30套，前者售$110,000，後者則售$120,000，比普通版貴接近一倍。
同普通版的分別，在於機身用上黑白熊貓配色，以及觀景器旁多了個熊貓logo及CHENGDU CHINA字眼，其他方面就同普通版無分別。 熊貓版M-P 只會在中國及港澳發售，而香港今次分到11套限量版，但代理回覆話全部名花有主，所以以上價錢只是參考價咋。
