好多人坐車都會睇版，不過下下用串流，都好快用完。另一方法用離線睇，但佔用手機容量多，睇得耐又怕無電。而最近國產品牌樂泡就推出一款名為「追劇神器」的產品，一部機有容量同當外置電用，劇迷一定like！
夠膽叫得自己做追劇神器，功能絕對不會如此簡單，首先內置 9000mAh 電量，提供 5V/1.5A 電量，雖然充 iPhone 比較吃力，但充 Android 手機一定無問題一般手機可充兩次至三次左右，一日一定夠用。其次是容量，內置雖然只得 32GB 記憶體，不過以一部電視劇 200 至 500 MB 計算，放二、三十集卓卓有餘。加上重量不過 150g 左右，同一部手機差不多。
剛剛都講過，單單是有電量、容量，都未算勁，最勁是自帶 Wi-Fi 功能，用家只需要將部機連接手機專用 app ，就可以將神器駁埋家用 Wi-Fi 上網，揀好要下載的劇之後，就全程「自動波」，想睇再開返專用 app 就睇到。另外，想俾其他人睇都好簡單，只要其他人用 Wi-Fi 接入部機，再開指定網頁，一樣可以一齊煲劇，兩、三個人各自睇都完全無難度。至於價錢方面不算貴， 32GB 版本都只不過 400 人民幣（約 $472 ）有找，值得推介！
來源：樂泡
