雖然話 Samsung 近年的手機銷售下降，不過宣傳都要繼續做，好似早前就在銅鑼灣怡東廣場對外開設 Samsung Galaxy Studio ，展示旗上新產品。雖然有好多產品都見慣見熟，但最新開賣的 Gear VR 眼鏡亦都會展出，以仿如 175 吋屏幕睇戲作為賣點，仲可以即場試玩。
外型變化少
講到 Gear VR ，其實已經出到第三代，雖然設計上同上兩代無太多不同，玩法更多變化。首先 Gear VR 會專為 S6 、 S6 edge 、 S6 edge+ 及 Note 5 等新機而設，而用法好簡單，只要將手機放入 Gear VR 入面，再配合 Samsung 專用的 app 就玩得，主要用機側設有十字型的觸控板操作，以手指雙點擊觸控板確定選項。
360 度虛擬影院
不過，就算有觸控板，操作上都未必好用，所以大部分操作都由頭部控制。無睇錯，用頭，因為今次專用 app 會你帶你進入一個 VR 世界，你可以 360 睇到一個虛擬空間，而空間上會有不同功能的方格，而只需要個頭轉到想點選的功能方格，再雙擊觸控板就搞掂。而今次所創建的 VR 世界，畫面都幾靚，真實感十足。
20 分鐘極限
而玩得 Gear VR ，用家最關心當然是做到咩。由於用家必需經專用 app 先可以，先可以玩到 VR 功能，所以下載都要經專用 app 下載，現時 Samsung 會提供 150 種遊戲及影片，數目上都算多，但並非所有都免費。不過都可以用 YouTube 睇 3D 片（記得左右畫面的 3D 片先睇到），但最重要是當使用 20 分鐘後，手機可能會出過熱警告，就算可以體驗 175 吋屏幕效果，都不能睇完一套戲。而今次 Gear VR 的售價比較親民，只需 $888 ，比上一代平一半，當玩幾個月試新玩具，都諗得過。
