〔 Letv英超 〕Letv終於公布了本地英超直播的詳細，千七蚊就可以睇足一年英超，都算幾抵。同時更公布了兩款超級手機以及3D頭盔，實行來一次大晒冷！
英超收費
先介紹英超直播套餐，睇足一季（10個月直播加2個月精華）就只需$1,690，如果唔想綁足一年約，亦可以選擇3個月（$597）或1個月（$229）的月費睇，不過如果要睇英超直播，就一定要先加入基本「樂迷99狂睇組合」（年費$990）計劃先得。基本月費如此，但當然如果買手機、電視或盒子都會有相應不同的贈送優惠，下文將會繼續介紹。
超級手機優惠
會場同時公布了兩款最新超級手機，包括旗艦的Le Max以及Le 1s手機，前者擁有業界最高標準裝備，包括6.33吋2K解像度Sharp屏幕、Snapdragon 810處理器、4GB Ram以及32GB Rom，而且更配備Sony最新2100萬像素鏡頭，絕對是最頂級的享受。後者Le 1s雖然以中階手機作定位，5.5吋1080p解像度屏幕、MTK Helio X10處理器、3GB Ram以及32GB Rom，但造工仍然出色，價錢都相當超值。Le Max就賣$4,499（包一年樂迷99狂睇組合以及一季英超直播）；Le 1s就賣$1,499（包三個月樂迷99狂睇組合）或$1,999（包6個月樂迷99狂睇組合以及3個月英超直播）或$2,999（包一年樂迷99狂睇組合以及一季英超直播），無論揀邊個計劃都非常抵玩。
同場加映3D頭盔
公布新手機之外，同場更公布3D頭盔「3D Helmet」，當用家戴上頭上，就可以睇到近1000吋巨大4K屏幕於眼前，再接上手機或其他影像裝置，就可以親身感到猶如戲院的享受。新機售價$2,699，亦都即將在網上開售。
