開心大發明 | 健康手臂支架 托出健康

成日對住電腦工作或睇戲的人，做到攰時無力撐起個頭，好易做到側埋一邊，想用手托頭，掛住打字點會仲有多隻手？日本電子配件網上商店Thanko就出手相助，今次真是推出一隻可調校角度的 健康手臂支架 ，幫電腦用家托住個頭，不怕影響坐姿。

Thanko這隻 健康手臂支架 ，可隨意調校高度及角度，只要夾在枱邊，就可用最適合角度托住用家個頭，減輕上肢的負擔，工作起來更順手。這條 健康手臂支架 最多可伸長95mm，就算夾在椅邊扶手都得，手掌同手臂都用軟綿綿的物料製作，認真舒服。定價約HK$320（台幣約$1,300），買返條來工作，保你健康。