自從 Sony 推出無反全片幅相機之後，已經明確分為可換鏡的 A7 系列及不可換鏡的 RX1 系列，兩個系統雖然話就話針對兩種不同用家，不過兩個價位就明顯相差無幾。好似新一代的 Sony RX1R II，單是定價超過兩萬，雖然功能拍得住 A7R II，但 A7 II 都不過賣萬三有找的今日，係咪仲值得追呢？
像素大提升
講到抵唔抵，首先當然要睇部機的賣點再決定，今次 RX1R II 最大賣點，就是採用 4240 萬像素背照式全片幅 Exmor R CMOS 影像處理器，像素可以話是現時機仔之中最高，甚至比之前的 A7 系列更加高。
可調式低通濾鏡
而另一個賣點，就是全球首部採用可調式光學低通濾鏡的相機，低通濾鏡主要減低摩爾紋，不過就會令到成像銳利度下降，所以上一代相機就將低通濾鏡拆除。不過，始於有情況會需要低通濾鏡幫手先影得靚，所以今次加入可調式低通濾鏡，可以話幫到唔少手。
對焦更快
仲有一個強項，就是加快對焦速度同對焦點，今次由於將感光元件由鋁線改用銅線，加快訊號傳輸速度，所以對焦速度亦都加快。而對焦點達到399點，兩者配合下，就算在連拍時，都可以每一張相都對到焦。這點 A7 系列的相機，就未有一部可以做到。
A7 II 價位更吸引
至於鏡頭方面，繼續沿用上一代的Carl Zeiss Sonnar T* 35mm F2 定焦鏡頭，設有可彈式的電子觀景器，以及設有多角度的顯示屏幕等，並無太大分別。作為一部定價 $26,490 的 Prosumer 相機，其實 RX1R II 都算交足功課，只不過相比 A7 II 的價位，唔追求像素同對焦速度的話，似乎吸引力，就大打折扣。
試相（像素減半）
