日本男星山下智久（山 P ）套《朝九晚五》收視同口碑愈推愈有，作為主角嘅山 P 自然飲得杯落，日前佢仲接受咗雜誌《 女性セブン 》訪問，佢就大賣口乖，狂讚 Johnny 事務所有咁偉大得咁偉大。不過，最後講咗幾句「人話」，話自己喺事務所 16 年，對友誼睇法有所變化。
唔知係講者有心，定聽者有意，篇嘢就被人指佢同赤西仁、錦戶亮等隊友，公開咁斷絕關係。事緣係山 P 去年六月，喺六本木同赤西仁、錦戶亮夜遊時，涉及搶女粉絲手機嘅事件。雖然，單嘢全世界人都知，山 P 只是為咗幫個底花晒嘅隊友赤西仁頂罪，不過，山 P 因呢件事被雪咗幾個月。
自此之後，山 P 就經常被爆同隊友傳不和，喺今年三月，山 P 仲喺節目《 山下智久 CrossSpace 》度，話自己決定重新審視自己嘅交友關係。嗯，種種表面證供屬實，唔使請金田一都知，山 P 怕被連累喇啩？
