日本漫畫《 JoJo 奇妙冒險》雖然唔係咩驚世巨作，但喺日本都叫做經典，粉絲都大讚佢打鬥場面都諗過度過，主角食腦多過無敵爆 Seed 。不過，由於作者荒木飛呂彦係服裝設計師出身，所以為咗襯得起「度身訂造」嘅奇裝異服，漫畫主角們集集都要擺埋啲完全唔符合人體力學嘅 Pose ，所以咁多年都未見過原著有真人化嘅作品。
但世事無絕對，拍過電影版《世界中心呼喚》、喺《草食男之桃花期》揸過長澤正美胸嘅森山未來，昨日就出演咗改篇自荒木本《死刑執行中脱獄進行中》嘅舞台劇，劇中，佢就飾演要逃獄的死囚。想不到，套劇獲一致好評，有評論仲話完全演出原著神髓。咁又係嘅，奇貌不揚嘅森山，其實自 97 年已開始演舞台劇，仲拎過唔少獎項，再講，佢 5 歲學爵士舞、6 歲學 Tick-tac 舞、8 歲學芭蕾，咁好「舞功」，擺甫士？濕濕碎啦。
來源：エンタステージ
