AKB48 的島崎遙香出名口不擇言，佢真係有嗰句講嗰句到超晒線，所以得到個「鹽對應」＊嘅絕世名號，日前佢被滾水淥親對腳後仲要出席公開場合，唔知係唔係負傷上陣心情太差，定係真係太過老實，竟然話以自己標準來說，指原莉乃個樣完全唔合格。
＊原意是「握完手以後就好似食到一口都是鹽一樣的感覺」，即不擅應對與及態度差的意思。
鬧女人樣衰真係大忌，身為當事人嘅指原緊係嬲爆，昨日就立即喺 Twitter 開 Po 兼開拖，瘋狂暗寸島崎遙香性格有問題，仲話人靚最重要係「性格」，仲揀咗批佢心目中最靚嘅隊友如柏木由紀、渡邊麻友、高橋南、山本彩，話揀佢哋唔係計人氣同埋樣貌，純粹係靠直覺。句句有骨，唔使講都知你嬲到震。不過，指原你又唔使嬲，不知幾多宅男都想有個好似你咁「樣衰」嘅女友……
