而家大家對影像、音樂的要求愈來愈高，睇戲要睇4K，聽歌要聽零失真，就連自己拍片同影相，都要愈高像素愈好。雖然質素會好好多，不過，儲存空間的要求就同步提升，買harddisk都買到窮，收藏亦佔地方。而家有種新的儲存技術 3D Cross-shift ，可以將一隻光碟，儲到過TB容量，你話幾好？
原來日本東京理科大學已成功開發出相關技術，基礎工學部山本學教授利用 3D Cross-shift 讀寫技術，令一隻DVD碟的儲存容量跳升400倍，最多可以儲存2TB容量。原理是除了用激光讀取平面數據外，通過傾斜投射激光，就可讀取埋垂直記錄的數據，令儲存空間由2D變成3D。不過，這種光碟讀寫技術最快要到三年後先會推出市場，以應付2020年日本奧運會的相關資料儲存需要，要耐心等一等。
