出國旅行，除了要訂機票酒店plan行程，另一件重要事項就是解決在當地的上網問題，因為要用來搵路，搵旅遊熱點，同埋將旅遊經歷即刻放上Facebook威威，無得上網實在令人頭痛。 GlocalMe 4G Wi-Fi 服務，毋須預先買當地SIM卡，拎住去旅行，一充值即用得，好使好用。
今次在日本大阪實試 GlocalMe 4G Wi-Fi 服務，用法好簡單，只要預先上網充值（以歐羅計費），然後帶著GlocalMe的G2專用4G Wi-Fi蛋(約HK$1,250)出國，去到當地一開機，Wi-Fi蛋就會自動搜尋當地接收得最好的網絡連線。試用時，用手機連接Wi-Fi蛋後，上網速度超快，睇串流片或搵地圖，幾乎都沒有連線時滯，效果順暢，就算同時連接三部裝置，上網速度都相當快，好爽。
現時 GlocalMe 4G Wi-Fi 服務覆蓋的國家達100個，採用劃一收費方式，0.05歐羅/MB，但大部分地區有封頂收費計劃，每日最多只收10元歐羅，雖然會比一般香港租蛋服務貴，但就靈活得多，如旅行當中有一兩日很少使用上網服務，拉勻來計就差不多。除了使用GlocalMe 4G Wi-Fi 服務，G2機上有SIM卡插槽，即是如果你有當地SIM卡，都可將G2當普通Wi-Fi蛋用，好方便。
雖然G2的機身頗厚，但由於充電池電量有6000mAh，基本上全日開機都毋須充電，大可不用帶尿袋，有需要時更可反過來幫手機充電。
