日本男星伊藤英明自從 04 年拍完《 海猿 》紅到癲後，近年拍親電影都專揀改篇作，可惜上套《 惡之教典 》飾演殺人狂教師，嚇親班師奶 Fans ，令佢人氣有所滑落。今日電影公司公布咗由佢擔正嘅改篇作《 火星異種 》（テラフォーマーズ）嘅宇宙服 Poster 。當睇埋張演員 List 就真係唔講得笑，計有山田孝之、小栗旬、山下智久、菊地凛子、加藤雅也、小池栄子、篠田麻里子……日本最紅嗰批，幾乎數咗大半。睇到最後，嘩，連超新星武井咲都有份，認真無得輸。
不過，當講到套片嘅劇情，都要潑少少冷水，事關套片係講地球派班經改造嘅超能人上火星打火星怪物，原著係超暴力、超血腥、仲有大量鹽花同「愛情動作片」鏡頭，但係呢班演員，唔係超級少女偶像、就係新紮玉女，個原著還原度真係有點令人擔心。
當然，宅男堅係想電影跟原著一樣去到盡，尤其係武井迷……
來源：ModelPress
