LeTV 新機北京發布中階機 Le 1S 今年到港

最近 LeTV 都叫動作多，剛剛先話投得香港英超直播權，今日又在北京推出新機。雖然之前好多人都話會出多一部高階機，不過事實是推出一部中階機 Le 1S 。外形上同之前部 Le 1 無太大分別，但所有規格都全部降一級，至於價錢同樣都降，但下降幅度又會否吸引到你？

屏幕縮水

之前 Le 1 以 5.5 吋屏幕示人，至於今次中階版的 Le 1S ，同樣使用 5.5 吋 1080p ，雖然無大芒睇得舒服，不過拎出街會更加方便。同樣以金屬製機身，加上無鏍絲裝嵌，拎上手都幾順手。而官方話部機屏幕都有改進，無咁易跌爛，當然這個功能就無得試。外形同 Le 1 好似，唯一不同是前相機略為向左移，話要切合左右平衡。

OLYMPUS DIGITAL CAMERA — 5.5 吋其實都幾順手，不過睇片就好似差少少。

相機降級

至於主相機，Le 1 及 Le 1S 都同樣使用 1300 萬像素，不過新機將支援 4K 拍攝功能，都算不錯。另外，機背同樣只得單色 LED 補光橙，相比現時大部分手機的雙色溫補光燈，感覺始終比較輸蝕。雖然官方話加強光度，而對焦速度亦都加快。最特別是自拍加入語音操作，例如向手機叫「白一點」便會自動調美肌、叫「素顏」又會加重對比，不過當然要講國語先用到。

指紋辨認加快

在機背主相機下方，則設有指紋辨識功能，同之前不同的是，會改用光滑面，睇落較靚仔，但用落就勁多指紋印。至於辨認速度方面，亦都會加快，實際使用，大約 1 秒辨認到，同 iPhone 6s 的反應差不多。至於其他功能方面，就無太大分別，雖然今次支援最新的 EUI 5.5 版本，應該可以開啟畫中畫播片，不過在場工作人員，就無一個識開……

螢幕快照 2015-10-27 下午11.23.50 — 除了手機之外，仲發布了 120 吋大電視，售價比其他廠平，不過都要 49.99 萬人民幣，土豪先會買。

螢幕快照 2015-10-27 下午11.24.01 — 另外，仲有同車廠合作開發車用 UI ,其中一間是 Aston Martin 。

硬件規格無驚喜

作為一部中階機，硬件規格上貼近 Le Max ，改用近期大熱的 MTK Helio X10 Turbo 2.2GHz 八核心處理器、同時設有 3GB RAM 及 32GB ROM 、內置 3000mAh 電池，都算夠用。大家可能會覺得，LeTV 發布過幾部機，例如 Le Max 香港都未有，新機香港推出日期更加遙遙無期？不過有消息指 Le Max 行貨會在 11 月見街，至於新機等到 12 月就有，如果屬實，都不算等太耐，問題是你會不會等。