今次 Huawei Mate S 發布會，同時亦都發布埋 Huawei Watch ，其實這隻錶好早之前已經展出，而外國亦都賣緊，至於香港，反而仲未有發售詳情同價錢，都幾令人失望。不過，作為新一代的 Android Wear ，最大賣點就是款式選擇夠多，至於外國賣 349 美元起（約 $2,722 起），香港又會賣幾多錢？
由於 Android Wear 始終有一定規格，所以硬件上，與 LG Watch Urbane 及 Moto 360 好相似，例如採用 1.4 吋圖形 400 x 400 像素 AMOLED 屏幕、內置藍牙 4.1 及 Wi-Fi ，具有心跳監測及 6 軸感應器等。而錶面直徑 42 mm ，並不算太大，男女都合用。另外，錶身以 316L 不銹鋼製作，亦會加入藍寳石水晶面，硬度高不怕刮花。亦都具有 IP67 防水功能，加上有皮帶、黑色鋼帶同金色鋼帶三種選擇，都有一定吸引力。
而由於內置最新的 Android Wear 系統，所以 Huawei Watch 亦支援 Android 4.3 及 iOS 8.2 以上的系統，亦即時兩大陣營通殺（雖然我都諗唔到有咩理由用 iPhone 唔用 Apple Watch ）。但最重要一點是 Huawei Watch 只內置 300mAh 電池，比 LG Watch Urbane（ 410mAh ） 及 Moto 360（ 320mAh ）都要少，官方數字指只能使用 1.5 天，七除八扣，隨時未必用到一日，實際用到幾耐，就要等正式見街先知。
