鍾意用Holga菲林機影相，全因愛上它的缺憾美及不可測特性，影出來的相每次都充滿驚喜，好有活在當下的感覺。這部菲林機將會數碼化， Holga Digital 將會由香港人製造，並放上Kickstarter集資，相信好多影友撐。
今次 Holga Digital 將會由Holga同本地生產影音數碼產品品牌Smartgears合作，雖然新機數碼化，但拍攝功能都幾保持到原機神髓。首先 Holga Digital 機身無屏幕，除了可以揀白天陰天設定及120/135菲林格式選擇外，其餘功能一概欠奉，張相影成點，要抽出SD卡去其他裝置睇先知，感覺同玩菲林機要晒相後先睇到結果一樣。試用相機影相，影像同傳統Holga機差不多：對焦模糊、四邊朦朧、黑角漏光，幾乎將舊機所有缺憾性數碼化。
Holga Digital 將會在今個月26日開始在Kickstarter集資，目標是五萬蚊加元（約29萬港幣），以Holga這個品牌來講，相信會有好多fans支持，至於是否滿意數碼化後的效果，就要玩過真機至知。
