現代中小企做marketing，太貴的未必有資金可以做，但太平的又怕無效益，究竟應該點去做，有時都幾難取捨。而在香港開創市場推廣免息分期的GC Communications，可以話幫中小企解決不少問題，既可令資金更有效運用，同時亦能達到高宣傳效益。但以為搞市場推廣免息分期已經夠特別？創辦人兼客戶總監周煒琳（Christy Chau）更加特別，一個女仔由印刷機師傅變成公關，又由公關做到客戶總監，未必人人可以做得到。
「賊船已上，都要盡力去做！」
Christy由14歲開始已經進入社會，全因一個誤會，「當年升中四，老師話未知有無位可以升，就叫我報讀個印刷相關的課程先，有中四位就可以升上去。點知印刷課程收我，個老師就話中四有位都不會收，就迫住走去讀印刷。」她還記得入到班房，女仔數目得幾個，面對住的是一部高過自己幾倍的印刷機，「好多女仔讀到一半，就已經無讀，最後攞到印刷女師傅資格，可以操作大型印刷機的，只得我一個。」
「時代改變，人就要求變！」
身材細小的Christy，老實講好難想像做過四年印刷，「當年搬物料全部自己做，所以條腰好快有問題，醫生話一係做手術，一係打類固醇，所以最後轉做印刷文員及營業員。當時自己始終識揸印刷機，好多工序我都好熟，所以印刷廠話有咩做唔到，都呃唔到我。」而且更開了一間廣告印刷公司，接訂單再搵印刷廠印。「當時收入都幾好，訂單多到唔憂做。不過，工廠北移加上數碼印刷興起，好難再做落去，於是忍痛結業。」
「辛苦？怕啊，但更怕落後於人！」
隨著社會的改變，雖然Christy亦繼續做廣告印刷，但夕陽行業好難有前途，加上當年只得廿四、五歲，不如轉行放手一摶。「其實接觸廣告相關，發現自己都幾鍾意公關，於是膽粗粗去搵工，仲要搵間上市公司見，竟然最後請我。」她口中的上市公司，就是香港體檢，「所有工作都由頭學起，但真係學到好多marketing的知識。」不過，大公司分工仔細，好多時只能專門負責一、兩個部分，「想學得更多，就要入公關公司，一腳踢，全個計劃跟晒，一定咩都學到。」結果做了三年，便由舒適的內部公關，轉到地獄的公關公司工作，什麼都做搏到盡。
「三年做三十幾個計劃，一個月做一個？幾個月做幾個至啱！」
雖然一早有心理準備，但公關公司的地獄級數，完全難以想像，「同一時間要跟幾個project已經係基本工作，試過有次最誇張，半夜4點收工，朝早7點再跟event，當時仲要新婚不久，你可想而知有幾嚴重。」雖然辛苦，但由於工作一腳踢，令到Christy學到更多公關知識，亦同記者有更緊密的關係，無論工作經驗或是人脈上，都進一步提升。
「搵政府未必幫到你，但我可以幫你。」
而在上年，更決定自己開設GC Communications，賺錢當然想，更重要的是想幫到更多中小企，「做了公關之後，發現中小企做市場推廣最辛苦，之前少同公關公司打交度，好多嘢都未必識，資金又少，隨時做得少少嘢就已經over budget。有次行過電器鋪，就覺得電器都可以免息分期，點解做marketing唔可以？」於是就不停同銀行傾，最後同東亞銀行達成協議，只需利用私人信用卡簽賬就可以做分期。「只要過一千蚊就可以分期，由小型的推廣計劃，到為期三個月以上的推廣都有，已經吸引不少中小企有興趣，始終做生意，自己賺到錢，對方都賺到，達到雙贏效果先最好。」
