灣仔電腦節除了有電腦產品，當然亦都有配件賣，而且唔單止係電腦配件，仲有好多手機配件，散布係會場兩側位置。其中以手機殻、平板機殻減得最甘，部分$20、$30就有交易，如果淨係睇價錢，仲以為自己去咗福仁間老雜！
激筍店更似十蚊店
一入會場行去左邊，過晒大攤位就會見到激筍店，而且激筍到唔單止減一半，好多產品都減到剩係 $10 就買到，當中有iPhone 6 機殻、iPad mini 套、USB 伸縮線同防撞袋，就算買快速充電線都 15 蚊起，出面賣緊 5、60 蚊，都幾抵買。
平霸開倉大量iPad套$20
至於位於會場中間位置的平霸開倉，都有不少筍貨可以揀，例如有大量新舊款的 iPad 套，全部賣 $20 ，仲有即場幫你搞無線充電，新機舊機都得，有興趣都可以試吓。
運動手帶做藍牙賣 $499
有得做運動手帶，又可以做藍牙聽電話，仲可以計步又防水，聽功能無過千都落唔到樓，不過係 H21 至 24 ，就賣緊 Arena Play-X S-WATCH ，有齊以上功能，都係賣 $499 ，支援晒 iOS 同 Android ，抵玩喎。
買SSD都抵
電腦節兩邊都有唔少賣硬碟、記憶卡嘅攤位，今年又抵唔抵？其中最抵玩，相信就係SSD，最平嘅SanDisk SSD PLUS 120GB版，賣緊$350，同部電腦升級就最啱。至於記憶卡，32GB好多都賣緊$7X左右，都好值得買，不過一上到64GB，就同街價差唔多，要諗過先好。
Nakamichi買聽筒有VR眼鏡
至於做開耳筒嘅Nakamichi，今次都有擺攤位，仲搞個「真人真聲」體驗Bundle限量優先30套，可以同時買齊NEP-MV15同VR眼鏡，有興趣都可以去八吓。
無線運動耳機
肥仔開倉展場，有一副藍牙無線運動耳機，雖然不可以落水，但都可以擋到汗水同細雨，二百蚊仲想點？
藍牙音樂手錶
在FAZEIN展場，就有幾款功能手錶大平賣，其中有一款內置記憶體俾你放音樂，再用藍牙耳機接駁就聽到，一百蚊一隻，另外仲有一款有溫度計添。
