講到近期手機（正確講應該是國產機）最鍾意的功能，相信非大屏幕莫屬。早前Huawei MediaPad X2，採用7吋屏幕，賣價$3,280。而最近Lenovo再推出多一部PHAB Plus，雖然屏幕細少少，只得6.8吋，電量亦只得3500mAh，不過內置Dolby Atmos，二千五蚊有找，你有無興趣？
九成金屬機身
其實屏幕大的手機，更加講求手感，因為手感不好，就更加容易跣手。而今次PHAB Plus採用大量磨砂面鋁合金製作機身，除了有助散熱之外，拎上手都幾穩陣。而作為大屏幕手機，都一定有單手模式，今次只要直接在屏幕寫個c字，點都方便過某牌子home鍵左掃右掃，掃到頭暈。
主打睇戲睇片
其實用得大屏幕，預了專攻睇片，全高清顯示已經是常識，再來就要玩音效。PHAB Plus所使用的Dolby Atmos，有好分明的立體聲?插耳筒先聽到。用手機喇叭睇戲，有層次但方向感一般，不過聲量就夠大，放在桌上聽都無問題。而在手機內亦能針對不同的用途，例如聽歌、睇戲、打機等不同用途，來設定Dolby Atmos的音效，抵讚。
影相功能不過不失
主相機設有1300萬像素感光元件，亦設有雙色溫閃光燈，硬件都是這幾種，沒有太特別。至於拍攝功能上，對焦夠快，作為同價位手機，合格有餘。另外，拍攝模式都算多，設定內有齊人面追焦、手動ISO 1500、降噪等功能，無驚喜但亦不會失望。
最大缺陷是……
問到規格如何，PHAB Plus亦都算不錯，除了設有Qualcomm Snapdragon 615 八核處理器之外，亦都會內置32GB ROM，以同價位手機而言不多。另外，亦支援雙卡雙待雙4G，中港兩地都支援。明眼人應該睇到，我仲未提過RAM，因為部機只得2GB RAM，作為現時手機用量而言，略為不足。
規格
網絡：FDD、TDD LTE / WCDMA / 四頻
作業系統：Android 5.0
處理器：Qualcomm Snapdragon 615八核心（1.5GHz + 1GHz）
屏幕：6.8吋1920 x 1080像素
相機：1300萬像素（後） / 500萬像素（前）
記憶體：2GB RAM / 32GB ROM
通話 / 備用時間：約8.5小時 / 350小時
其他功能：雙卡雙待、1080p影片拍攝、雙色補光燈、Dolby Atmos、藍牙4.0、Wi-Fi、GPS
體積 / 重量：186.6 / 96.6 / 7.6mm / 220g
售價：$2,488
