〔 韓國自由行 〕最近香港解除韓國外遊警示，一班韓迷當然急急腳準備去韓國首爾玩，而除了機票之外，第一樣要做的當然解決住宿問題。其實要住得平，最好當然搵人所共知的民宿app「airbnb」幫手，介面已經有齊中文，只要識字，都一定知如何訂到房。既然如此，仲要介紹？因為要訂到好房，當中有不少技巧，並非只要夠平就得。
重點1
地理位置：機鐵站沿線
自由行去首爾，由機場去市區，通常有兩個方法，一是坐機場巴士，二是坐機鐵。坐機場巴士的好處是好早有車，全部都有中文地名，車上亦都有普通話廣播，細心聽一定識落車，不過去住宿地點，就要搵兼問人。至於機鐵，直手達市區又可以轉乘地鐵，所以如果坐正常時間航班（非通宵機），坐機鐵會比較容易掌握。
亦都因為坐機鐵比較易坐，所以選擇民宿，都最好近地鐵站為先，雖然在airbnb有不少平價的民宿，但好多位置都比較遠。所以小編建議，要找方便民宿，位置可以考慮機鐵沿線的首爾站、弦益大學站，無論去哪個景點，都好方便。大約$300至$500有交易。如果不怕轉線，亦可選擇新村，平均$300已經有好多選擇。不過，選邊個地區都好，最好選擇離地鐵站5分鐘可到民宿，否則拎住行李，都幾辛苦。
重點2
上網：固網還是流動
租民宿除了地理位置要選得好，另一個重點是用什麼上網。你可能會問，不是所有民宿都有Wi-Fi？其實去得韓國住，上網一定會有，但有部分民宿提供的，是Pocket Wi-Fi上網，好處是可以出街都用得，亦可減省租Pocket Wi-Fi的費用，平均一天大約$60計算，去足5日便可慳到$240，亦毋需在機場借 / 還，直接退房時交低即可。
重點3
房間：一定要問清楚
如果只是兩個人去，租民宿有無房當然不成問題。但如果是一大班人一齊去，想租一間民宿同住，就一定要考慮房間分配問題。當你滿以為輸入好房客數目，要多少個床位，就一定無問題？錯錯錯！因為當地有不少民以上下格床設計，兩間房可放置16人，同住青年旅社無分別。亦有好多民宿，以為床位夠，但原來有一半以上是要睡在地板上，加上影相時經常一間房影N個角度，看似以為有好多間房，但實則可能只有一間！所以付款時一定要問清楚房間數目、真正的床位數目，能否好好分配，否則去到先知，就出事！
Android下載
iOS下載
